Proverbi ed aforismi

Kompilita, adaptita e tradukita da ‘Partaka’.

• Hundo aboyanta, ne mordas.
• La diablo plusajesas pro sua oldeso kam pro sua diableso.
• Ne pro tre frue levar su, plu multe frue jorneskas.
• Ta qua semas vento, rekoltas tempesto.
• En lando di blindi, la tuerto es la rejo.
• Ta qua frue su levas, da Deo helpesas.
• Lo bona, se konciza, duople bona.
• A kavalo donacata ne regardez la dentaro.
• Ad intelektozo suficas poka vorti.
• Agitita rivero, ganajo di peskero.
• Tante la krucho al fonto portesas, ke tandem ol ruptesas.
• Pano kun pano, manjajo di stulti.
• A ta, qua Deo donez ol, sant Petro benedikez ol.
• Mem vestizita per silko, simia esas simio.
• Che la forjisto, ligna kultelo.
• A mala vetero, bona mieno.
• Ta qua ne ploras, ne sugas.
• Ad enemiko qua fugas, arjenta ponto.
• De tala ligno, tala splito.
• Ye tanta kapi, tanta chapeli.
• Barcelona es bona, se la burso sonas.
• Kato qua eskaldesis, aquon kolda fugas.
• Kaptesas plu rapide mentianto kam klaudikanto.
• Klovo ektiras altra klovo.
• Malajo di multi, konsolaco di stulti.
• Aden boko klozita ne iras mushi.
• Esas nula surdo plu mala kam ta qua ne volas audar.
• Kande la rivero sonas, aquon ol portas.
• Edukez korvi, e li ektiros tua okuli.
• Ye Kristnasko, singla homo en sua loko di nasko.
• Ta qua kantas, sua malajon forigas.
• Trauri, se kun pano, esas min trauroza.
• Granda fisho manjas mikra fisho.
• Deon pregar, ma dum martelagar.
• Ube esas kapitano, maristo ne imperas.
• Pano nomesez pano, e vino nomesez vino.
• Avareso ruptas la sako.
• Donez a me pano e dicez a me stulto.
• Kavalo-starto ed asno-halto.
• Kande la diablo facas nulo, per sua kaudo ocidas mushi.
• Ta qua esas furtisto pensas ke omnu furtas.
• Yaro nova, vivo nova.
• Ta qua per fero mortigas, per fero perisas.
• Ta qua furtas de furtisto havas cent yari de amnestio.
• La hundo mortinte, desaparis la rabio.
• Ta qua ne volas polvo, ta ne irez en drasheyo.
• Ne la tota monto esas origano.
• Irga-loke, ube tu iros, agez tale quale tu vidos.
• En mikra flakono trovesas la maxim bona konfitajo.
• Esas nula malajo duranta dum cent yari.
• Ube esas pili, esas gayeso.
• Ta qua havas boko, eroras.
• Preferinde tarde kam nul-tempe.
• Preferinde esar kapo di muso kam kaudo di leono.
• Til la kaudo, tauro esas tauro.
• Pano por hodie, hungro por morge.
• Kato gantizita ne chasas musi.
• Kulon me vidas, kulon me deziras.
• Ye la boko mortas fisho.
• Dumnokte, omna kati esas bruna.
• Ta qua ne riskas, ne transiras la rivero.
• Esas preferinda mortar stacante kam vivar genupozinte.
• Okuli qui ne vidas, kordio qua ne sentas.
• Se esas reda firmamento, esos pluvo od esos vento.
• La okuli esas la spegulo dil anmo.
• Ta qua havas amiko, havas trezoro.
• Por singla butono esas buton-truo.
• Aquo pasinta ne movigas muelilo.
• Muzikisto prepagita, ne bone pleas.
• Irar por lano e rivenar tondita.
• Ube oli donesas, oli prenesas.
• Fortunozo pri ludo, desfortunozo pri amoro.
• Plubonesas ucelo enmanue kam cento de li fluganta.
• Ta qua hungras, pri omleti sonjas.
• Plubonesas habileso kam forteso.
• Rejo ekirinta, rejo enirinta.
• Plubonesas preventar kam plendar.
• La amiki di mea amiki esas anke mea amiki.
• Ta qua serchas, trovas.
• Arivar e kisar la santo.
• Ta qua misiras, egaras.
• Ta qua kun kati kushas su, skrachita levas su.
• Plubonesas malajo konocata kam bonajo konocota.
• Ye magra hundo, pulci-abundo.
• Kapro sempre tendencas a monto.
• Viro ed urso, quante plu piloza tante plu bela.
• Hanino qua ne manjas, ne ovifas.
• Olda bovulo, rekta sulko.
• Ye granda problemi, granda solvuri.
• Ek olda hanino facesas bona buliono.
• La mentiado havas kurta gambi.
• Ube manjas duo, manjas trio.
• Ta qua amas tu, plorigos tu.
• Por vera hungro ne esas harda pano.
• Agez benignajo sen egardar vizajo.
• Pluvo nul-tempe komplezas ad omnu.
• Venjo esas disho qua manjesas kolda.
• Ta qua ne havas bapto-patro, ne baptesas.
• Ne savas parolar ta qua ne savas tacar.
• Kuglo qua zumas ne mortigas.
• Mala glaso ne ruptesas.
• Silenco esas la unika amiko qua nul-tempe trahizas.
• Patro sparema, filio spensema.
• Ta qua dion transiras, yaron impulsas.
• Guteto pos guteto facesas rivereto.
• To quo ne mortigas, grosigas.
• La sajeso ne transmisesas, ma lernesas.
• La maxim olda arbori donas la maxim dolca frukti.
• Amoron e tuson on ne povas celar.
• Ube esas vivo esas espero.
• Lektar dum manjar ne darfas esar.
• Agreabla esas gasto, se lu ne longe restas.
• Ta qua ne havas alio, havas onyono.
• Ube esis fairo restas cindro.
• Ta qua timas sufrar, sufras pro timo.
• Kande la pekunio parolas, la vereso tacas.
• Se tu falas sep-foye, staceskez ok-foye.
• To, quo esas promisita, esez atencita.
• Perucho esas verda irga-loke.
• Pos la tempesto rivenas la kalmeso.
• Kande pordo klozesas, altra pordo apertesas.
• On manjas por vivar, ma ne vivas por manjar.
• A paroli stulta, oreli surda.
• Hodie flatero, morge trahizero.
• Multe helpas ta qua poke jenas.
• Ye harda pano, akuta dento.
• A ta qua multon posedas, plu multon venas.
• Adube la kordio inklinas, la pedo moveskas.
• Quante plu multa yari, tante plu multa destrompaji.
• Nulu sentas ke dolcajo esas bitra.
• Adube on estimas tu tre multe, ne irez tre ofte.
• Esar aprentiso pri omno e maestro pri nulo.
• Stomako plenigita, kordio kontentigita.
• Olda kavalo ne lernas nova trotado.
• Singla masto suportez sua seglo.
• Kande kato ekiras, musi promenas.
• Kordio qua deziregas, ne havas repozo.
• On valorizas lo bona erste pos perdir lo.
• Plubonesas kelko kam nulo.
• Singla docero havas sua doco-maniero.
• Singla moneto-peco havas du flanki.
• Asno bone savas en qua domo bramas.
• Kande minim expektite, la leporo saltas.
• Kun pacienteso, la cielon on ganas.
• Konsilin me vendas, e me ne havas por me.
• Aquo, quan tu ne bezonas drinkar, lasez ol fluar.
• Ek to, quo ne kustas, plenigez la korbo.
• Ek arboro falinta, omnu facas ligno.
• Bonajo marchas e malajo flugas.
• Ta qua sparas, sempre havas.
• Dum milito-tempo, irga foso esas trancheo.
• Ta qua su exkuzas, su akuzas.
• Amoro egaligas omno.
• Okulo di mastro grosigas la kavalo.
• Bon advokato, mala vicino.
• Bona kalmaro povas natar en irga maro.
• Aquo sempre retrovenas a sua lito.
• To quo ek aquo facesas, quale aquo desfacesas.
• Dicar diskrete ed agar sekrete.
• Kordio havas rezoni, quin raciono ne intelektas.
• Fidinda pagero ne bezonas gajo.
• Ta qua multe parolas, multe eroras.
• Ta qua perseveras, vinkas.
• Tempo kuracas omno.
• En domo di komuneso ne montrez tua habileso.
• Ludar e promenar, kande on ne mustas laborar.
• Prizata skabio ne pruritas.
• Ta qua facas un korbo, facas cent korbi.
• Por pano du-semana, hungro tri-semana.
• Vinko sendanjera, triumfo sengloria.
• Tante multe natar por an la rivo mortar.
• Omna voyi duktas a Roma.
• Se la vivo donas a tu limoni, facez limonado.
• Ta qua manjas la karno, rodez la osto.
• Ta qua fugas, timas ulo.
• Ta qua recevas, su obligas donar.
• Quankam tu balnez porko, lu sempre serchos fango.
• Bone balayas nova balayilo, ma ol balde oldeskas.
• Por dansar tango bezonesas duo.
• Esas nulo plu chera kam to quon on kompras per pregi.
• Esas ulceri qui ne kuracesas e dum la tota vivo li restas.
• Ne existas cielo sen nubi nek paradizo sen serpenti.
• Ne renuncez lo ganinta po lo ganonta.
• Nulu esas profeto en sua lando.
• Nulu esas saja pro la savo di lua patro.
• Ye poka barbo, poka shamo.
• On abandonas afero qua ne plus donas.
• Ne deskurajez pri povreso, nek prezuntez pri richeso.
• Nul-tempe duesma parti esis bona.
• Plu multe agas formiko marchanta kam tauro repozanta.
• La paroli forportesas dal vento.
• Muliero infirma, muliero eterna.
• Esas nula kalvo qua ne havis bona hararo.
• En sako di mendikanto esas nul-tempe sata quanto.
• Se tu volas enemiki, prestez pekunio a tua amiki.
• Tacanta stulto esas quale muelita oro.
• Sordida linjaron on lavas enheme.
• Ne esas plu bona lotrio kam laboro ed sparo.
• En domo di povro, omnu krias ed omnu esas justa.
• A homo audacoza la fortuno donas la manuo.
• Nulu stonagas sua propra tekto.
• Filio sen doloro, matro sen amo.
• Ta qua vivas de favori, servas tre multa siniori.
• Libro prestita, libro perdita.
• Ledeso ne esas chasteso.
• Dum facar e desfacar, on sucesas lerneskar.
• Vendez felo di urso erste pos chasir lu.
• Bona tuko vendesas en la kofro.
• Unesme esas la obligeso e pose la devoteso.
• Til ke la hanulo kantas, la hanino volas kantar.
• Cent yari pos nun, ni omna esos kalva.
• Lango havas nula osto, ma ol povas tranchar kosto.
• Hundo aboyez a me, e lu ne mordez me.
• Blindo sonjis vidar, e lu sonjis quon lu volis sonjar.
• Oportas ne sputar al cielo.
• Agez malajo ed expektez similajo.
• Dum ke me esas che me, rejo esas me.
• Gasti arivos, qui de nia domo nin forigos.
• Ye multa vento, poka seglo.
• A ta qua ne volas buliono, on donez tasedo e duima.
• Hungro akutigas esprito.
• Olivo manjita, kerno forigita.
• Ne tanta tablo-tuko, e plu multa kuko e suko.
• Prefere asno vivanta kam doktoro mortinta.
• Inter joko e joko, verajo prenas loko.
• Richigez asno ed on egardos lu kom sajo.
• Ye lego nova, ruzo nova.
• Nek amo koaktita, nek pedo klemita.
• Povresas ne ta qua havas poko, ma ta qua deziras multo.
• Nula-tempe pluvas til ke Deo volas.
• Tre bone odoras ta qua nule malodoras.
• Plubonesas un amiko kam cent parenti.
• Ne ajornez til morge to quon tu povas agar hodie.
• On agez quale lu devas ed aceptez to quo a lu venas.
• Singlu raportas la ferieyo segun sua propra estaleyo.
• Nula plu bona spegulo kam anciena amikulo.
• Ne por boko di asno facesis la mielo.
• Floro di beleso havas di floro di mayo la dureso.
• En kofro apertita, mem la yusto pekas.
• Ek ita polvo devenas ica fango.
• Se tu remarkas mea progreso, remarkez mea laboremeso.
• Plubonesas mal aranjo kam bona litijo.
• Makulo de reda moruso efacesas per verda moruso.
• Quante plu multe on posedas, tante plu multe on deziras.
• Se tu naskabas por martelo, falos a tu klovi del cielo.
• To quo dumnokte celita restas, pos un yaro manifestas.
• Plubonesas pazado duriganta kam trotado fatiganta.
• Oportas experiencar lo e pose dicar lo.
• Ye la peko ipsa, lu portas la puniso.
• Ta qua naskas kom porko-yuno, mortas kom porko.
• A l’aroganteso demandar, la vertuo ne donar.
• To quo por brakio bonesas, por dorso malesas.
• Strado-lanterno, obskureso en sua hemo.
• Iraco interfratal, iraco diablal.
• Kaze di dubito, elta plu mamuda.
• To quo dal furteri ne forportesas, che l’anguli trovesas.
• Fluganta ucelo, quik aden padelo.
• Hungranta volfo ne havas sidilo.
• A chasta muliero suficas Deo.
• Desvestizar santo por vestizar altra santo.
• Vestizez me lente, nam me hastas.
• Amoro distanta, omni quar felica.
• Esas nula stulto qua ne egardas su ipsa kom sajo.
• Nek iraciganta ledino, nek deziregata belino.
• Kande hirundo per alo sulon frolas, aquon lu volas.
• Singla folo kun sua rolo.
• Onu ne povas klosho-plear e procesione marchar.
• On balde desvestizas ta qua de altru su vestizas.
• Od interne od extere, e ne altra-maniere.
• Obedio e pacienteso esas bona por sajeso.
• Ligna kultelo ne tranchas, ma kontuzas.
• «Ni plugabas», a bovo musho dicabas.
• Ante obtenar, promisar.
• Pos obtenita, nulo de lo promisita.
• Se farmo-lugita, balde ruinita.
• Multa bruiso e poka nuci.
• Askoltar meso e donar hordeo ruinis nula jornedo.
• Omna-loke koquesas fabi.
• Pos manjir tua pano, me obliviis tu, kompano.
• Singla-die, kande jorneskas, la nombro de stulti kreskas.
• Lo pasinta esas pasinta, e lo male facita, pardonita.
• Okuli qui vidas ne oldeskas.
• Filifanta filiino, mariajebla filiino.
• Ne samesas predikar kam frumenton donacar.
• Esas plu multa dii kam socisi.
• Kreveto, qua dormeskabas, dal aquo-fluo forportesabas.
• Esas tre leda atitudo la ne-gratitudo.
• Yaro nivoza, yaro profitoza.
• Amoranti iraceskinta, amori kreskiginta.
• Ante agar, oportas reflektar.
• Quante plu evoza, tante plu savoza.
• Nul-kaze retroirar e nul-tempe kapitulacar.
• Nek senhara, nek kun tri peruki.
• Okaziono piktesas kom kalva.
• Granda kasrolo, mikra testamento.
• Manui donacanta: quon vi esas vartanta?
• Ube la mastro absentesas, la perdado produktesas.
• Pro pariar mea zono, me perdis mem la kalsono.
• Ye vintro pluvoza, somero abundoza.
• Irez ad altra hundo kun ita osto!
• Quante plu multa honoro, tante plu multa doloro.
• Manjar til maladeskar, e fastar til saneskar.
• Konsilo ne demandata, konsilo male askoltata.
• Lu efacas perkude to quon lu skribis permanue.
• Erorar esas homala, pardonar esas deala.
• Pos dejuno, repozar, e pos supeo, promenar.
• Iraco esas foleso, dum sua tempo di dureso.
• La bezono maestrigas.
• La maxim granda richeso esas la saneso.
• To quo ne videsas, balde obliviesas.
• Ta qua furtas un-foye, furtas dek-foye.
• Quoniam ni esas en danseyo, ni dansez!
• Poke ofta vizito, agreabla invitito.
• Frapo donita, nek da Deo desdonita.
• Omna-die lernesas ulo.
• Mami di muliero tranas plu multe kam remorkero.
• Tasko qua prizesas, balde parfacesas.
• Me havez saneso, e pekunion ta qua prihavez intereso!
• Pri prizaji e kolori ne interdiskutas doktori.
• Se penvaloras facar lo, penvaloras bone facar lo.
• Ta qua komentas, inventas.
• Evitez troe laudar to quon tu pensas komprar.
• Ta qua pagas, selektas.
• Ta qua sorgas la centimi, nul-tempe indijas un euro.
• Ta qua da Deo amesas, da Lu vokesas.
• Amoro ne respektas lego, nek obedias rejo.
• Absenteso produktas oblivio.
• Porko qua netigesas, nul-tempe grosigesas.
• Dum ke onu manjas, apetito arivas.
• Espero esas bona dejuneto, ma mala supeo.
• Kelko esas ulo; min multe esas nulo.
• Ad omna hundo, lua glorio-sekundo.
• Por ta qua invitas su ipsa, ne esas mala repasto.
• Quo esas oldeso? Sternutar, tusar e pri tempo questionar.
• Ni omna havas kelketo di muzikero, di folo e di poeto.
• Plu multe kam sat multe esas tro multe.
• Laboro partigita esas plu agreable facita.
• On maxim bone flatesas, kande on imitesas.
• Quante min multo dicita, tante min multo korektigita.
• Hundo ed infanto, ube afecionanto.
• Jovdio fininte, semano pasinte.
• Grano pos grano plenigas sua kropon hano.
• Ante livrar tua geno, konsultez la kap-kuseno.
• Oro esas to quo quale oro valorizesas.
• Pasiono ne forprenas sajeso.
• Por mea beko, samesas oko kam okadeko.
• Ta qua di su ipsa ne esas mastro, di nulo esas mastro.
• Se on volas igar blindo kantar, unesme oportas a lu pagar.
• Fisho restez en aqueyo, e forjisto en forjeyo!
• Tandem, avaro spensas centople pro sua sparado.
• Pano di altru, nul-tempe esas mola.
• Ta qua peskas per angelo, iras adheme quale a duelo.
• Hundo ne kastresas du-foye.
• Yen ke aquo tante gravesas, ke olu mem benedikesas.
• Ne judikez libro pro lua frontispico.
• On protektez sua hemo kontre okuli di kritikemo.
• Por amoro e por morto, nula ne-atingebla fuorto.
• Mikra mutono esas singla-yare muton-yuno.
• Ta qua vivas inter volfi, lernas ulular.
• Dum ke novajin me askoltas, me pokope oldeskas.
• E bona ofico e mala ofico donas ad on benefico.
• Mala filiferon agacas la spindelo.
• Hundal prego ne eniras la cielo.
• Povreso nul-tempe levas kapo.
• Se Kupido tun vinkos un-foye, tu esos vinkita omna-foye.
• Plezuro qua ne komunikesas, plezuro ne esas.
• Povro, qua demandas pano, anke aceptas karno.
• Pipro, salo ed onyono lor prontigar buliono.
• Pokope, oldino filifas floke.
• Subisez procesi, mem se tu prihavas sucesi.
• Ta qua volunte esas bovulo, mem sua jungajo lekas.
• Me dicas lo a tu kontree, por ke tu komprenez me.
• Honesta homo, prefere ruptita kam sen honoro.
• Homo sen amiki esas quale arboro sen branchi.
• Po pekunio dansas hundo, e po pano, se esas gano.
• Singla homo sonas quale sua kapo sonas.
• A cielo-aquo ne konfidez tua agro.
• Manjajo qua tro multe rezervesis, putreskis e ne manjesis.
• Multa homi kune, ula skopo komune.
• Mem obteninte bonega okupo, nultempe vendez tua jupo!
• Por lernar oportas sufrar.
• Chagreno kunpartigita, chagreno lejerigita.
• Ne-kareebla gasto: pano e balasto.
• Viro griz-hara, nek olda nek saja.
• Un hirundo ne equivalas somero.
• E «pro ke no» e «pro ke yes» senrezona rezoni es.
• Lango di oro, ma nula laboro.
• Olda ucelo ne eniras kajo.
• Koncienco esas sam-tempe testo, akuzisto e judiciisto.
• Unesme la laboro e pose la trezoro.
• Ta qua ne regardas adavane, restas dope.
• Amiko rikonciliita, enemiko duopligita.
• Arjenta esas parolo, ma silenco esas oro.
• Preferindesas un «prenez» kam du «me donos a tu».
• Ta qua eludas okaziono pekar, eludas pekar.
• Ta qua konsilin ne askoltas, oldeson ne atingas.
• Ta qua pasionoze amoras, pasionoze desamoras.
• Ta qua senkugle pafas, nul-tempe mortigas.
• Ta qua bone agas, por su agas.
• Unesme mea denti, e pose mea parenti.
• Ye longa voyo, kurta pazado.
• Gasto e peskajo, pos tri dii, malodoras.
• Mixita esas ula kozi: apud urtiki naskas rozi.
• Oportas ne demandar piri de ulmo.
• Monaki manjas segun la gusto dil koqueri.
• Voco populal, voco cielal.
• Montras su kom savozo ta qua admiras pri nula kozo.
• Bona mantelo kovras omno.
• Ta qua afecionas Edmundo, afecionas ilua hundo.
• Paroko ne memoras, ke lu esis sakristo.
• Ti qui ganas du ed spensas tri, esas furteri.
• Ta qua sputas al cielo, sur sua vizajo faligas la salivo.
• Olda hundo ne aboyas vane.
• Kozo qua trovesas, ne furtesas.
• Quale la mastro, tale la hundo.
• Fastar, pos saturesar.
• Lo bona esis e lo mala esas.
• Se dion tu ne volas disipar, ne obliviez ridetar!
• Ta qua fishon peskas, peskero esas.
• Repozas la paginto e la pekunio-recevinto.
• Ta qua pri maro ne savas, pri malajo ne savas.
• Ta qua ne havas okuli, ne bezonas binokli.
• Sen vino ne esas meso.
• Nomo sequas homo.
• Verko laudas maestro.
• Ta qua durstas, de irga aquo drinkas.
• Nulu donas to quon lu ne havas.
• Ta qua deziregas omno, frustrita mortas.
• Ta qua un-foye perdas ol, ne plus vidas ol.
• Poka veneno ne mortigas.
• Paroli chipe vendesas.
• Mutono qua klaudikas, ne siestas.
• La bona fortunon di ledino deziras belino.
• Ne ja naskabas ta qua nul-tempe erorabas.
• La lakto, al pedo dil bovino.
• Amiko di multi, amiko di nulu.
• Ye mala judiciisto, bona furtisto.
• A meskina konsilo, ligna klosho.
• Buliono de hanino esas famoza medicino.
• Ta qua donis, tacez, e ta qua prenis, dankez!
• De mala vito, mala sarmento.
• Del maro, atuno, e del tero, mutono.
• Ube fairo facesas, fumuron ekiras.
• Amiko absenta: quaze lu esus prezenta.
• En domo bone jerata, nula povreso konocata.
• Avaro esas felica nek kom povra nek kom richa.
• Amoro esas rejo, e pekunio imperiestro.
• Inferno plenigesas per bona deziri, e cielo per bon agi.
• Troa bonajo efektigas malajo.
• Ta qua ne klaudikas, klaudiketas.
• Stomako qua hungras, askoltas nulu.
• Monako qua demandas por Deo, demandas por duo.
• Orea haltigilo ne plubonigas kavalo.
• Homa mendikanto, nul-tempe bona atestanto.
• Frukto de hodie, pano de hiere, karno de prehiere.
• Tre multe savas ta qua justa-tempe tacar savas.
• Til mortir, omno esas vivo.
• Lavita linjaro, sunon vartas.
• Agez quale me bone dicas, e ne quale me male agas.
• Mala herbo balde kreskas, ma anke balde oldeskas.
• Kuriozeso mortigis la kato.
• Fumuro e mala mieno forigas homo de lua hemo.
• Fugar de la cindro e falar en la brezi.
• Nun-tempe, anadi pafas ad eskopeti.
• Oportas konsilar nek enirar milito nek mariajar.
• Kelkafoye natas anado, e kelkafoye lu drinkas nek aquo.
• Domo sen muliero esas quale tablo sen pano.
• Nura prego poke valoras.
• Kani divenas lanci.
• Benigneso: ta qua havas ol, donas ol.
• Mala lito plulongigas la nokto.
• Granda vinko esas ta qua sensange obtenesas.
• Ta qua esas sinkanta, sizas mem klovo brulanta.
• Lango di mal amiko tranchas plu multe kam tranchilo.
• To quo kun ici perdesas, kun altri ganesas.
• Lo bona tedas e lo mala deziresas.
• Prego de rejo esas impero.
• Mala novaji sempre veresas.
• To quo facesis bone, aspektas bone.
• Suflas ventachi e proximeskas nigra nubachi.
• Plu multe facas ta qua volas kam ta qua povas.
• Esas preferinda produktar envidio kam kompato.
• Per lo pasinta divinas lo prezenta ta, qua esas prudenta.
• Pagez to quon tu debas, e saveskez quon tu posedas.
• Por veraji, la tempo, e por yustaji, Deo.
• Saneso, pekunio, longa vivo, e lor departo, la paradizo.
• Falinta stono ne havas retroveno.
• Pro tre multa frumento, nul-tempe esas mala yaro.
• Singlu forigez sua pulci!
• Ta qua en mueleyo iras, farinizita ekiras.
• Ta qua ne fidas, ne esas fidinda.
• Sekretajo konservesas, se ol a nulu dicesas.
• Meskina ucelo, meskina kanto.
• Ye tal amoro, tal doloro.
• Omno esas kontagioza, ecepte la beleso.
• Dio sen salajo, dio sen malajo.
• Per nur un stroko ne abatesas querko.
• Salo qua varsesis, nul-tempe bone rekoliesis.
• Relate pekunio ne esas amikeso.
• Pro nur un hundo, quan me mortigis, hund-ocideron me surnomesis.
• Ta qua ne reparas gutifado de tekto, mustos reparar la tota apartamento.
• Ta qua prestas pekunio ad amiko, perdas pekunio ed amiko.
• Ta qua fidas sua spozino ad amiko, sur la fronto prizentos la puniso.
• Ta qua ne esas felica kun poko, anke ne esos lo kun multo.
• Ta qua dominacas sua iraco, dominacas ya sua maxim danjeroza enemiko.
• Lu komencis per demandar almono, e lu finis per kushar su kun la mastrino.
• Singla homo esas mastro pri sua silenco ed sklavo pri sua vorti.
• Dicez a me pri quo tu fanfaronas, e me dicos a tu quon tu indijas.
• Plubonesas tacar e semblar stulto, kam apertar la boko e konfirmar lo.
• Ne signatez letri quin tu ne lektabas, nek drinkez aquo quan tu ne vidabas.
• Ta qua donacas, bone vendas, se la donacario ton intelektas.
• Plubonesas mikra krayono kam granda memor-kapableso.
• Me ne havas omno quon me amas, ma me amas omno quon me havas.
• Me esis bofiliino e nul-tempe havis bona bomatro; me esis bomatro e nultempe havis bona bofiliino.
• Ne demandez de ta qua demandis, nek servez ta qua servis.
• Me iris aden palaco; me iris en ol kom bestio ed ekiris ol kom asno.
• Vino, ligno ed amiki: quante plu anciena, tante plu preferata.
• Facar nulon on devus punisar: ta qua ne laboras, ta mustez fastar!
• Juez tua sat multo, dum ke la stulto serchas sempre plu multo.
• Ta qua ne laboras dum sua yuneso, dormas sur palio dum sua oldeso.
• Granda maestro esas povreso, ma olu shovas a desnobleso.
• Duo, qua sama matraco esas kunpartiganta, yen ke divenas samopinionanta.
• Ta qua partigas e disdonas, la maxim bona parton a su ipsa donas.
• Stulto marchanta iras sempre plu fore kam filozofo sidanta.
• Perdante me lernis: pluvaloras to quon me lernis kam to quon me perdis.
• Santa Rita, Santa Rita: lo donacita, ne plus es desdonacita.
• Quante bone dicis ta qua dicis, kande lu dicis to quon lu dicis!
• Amoro, per amoro pagesas; e lo cetera, per pekunio atingesas.
• «Stulto! Quon tu facas? — Me notizas to quo a me debesas, e to quon me debas, me efacas.»
• Nek tante multe, ke ol bruligez la santo, nek tante poke, ke ol ne lumizez lu.
• Peskisto di rivero e muelisto di vento, skarsa manjajo e plu skarsa testamento.
• Marto ventoza ed aprilo pluvoza igas mayo florifanta e sunoza.
• Kande viro jaluzesas, lu jenas, ma kande lu ne jaluzesas, lu iracigas.
• Ta qua bona pekunio ganas, bone spensez ol, ma ne disipez ol.
• Ta qua havas vitra tekto, ne lansez stoni adsur olta di sua vicino.
• En singla lando, olua kostumo, ed en singla domo, onua kustumo.
• Por mariajar su e por tauro-kombatar oportas proximeskar.
• Ta qua deziras maladeskar, supeas multo ed iras su kushar.